原來我一直都無完整聽過《同舟共濟》整首歌的歌詞。直到近月因緣際會下再聽，聽到最尾幾句，啤咗出聲，差點由個位度跌咗落地。
八九六四之後香港人心不穩，爆發移民潮。許冠傑以穩定人心為主題發佈了《'90 香港情懷》專輯。專輯歌詞太多歌頌香港人，勸人留守家園，又預測香港未來不會太差，準確點說是「維持原狀」。許生最懂得在香港低潮時期出擊，之後 2004 年再重施故技。歌神確係歌神，抵佢紅嘅。專輯主打《同舟共濟》一直好紅。以前港式鷝仔旅行團好流行派歌書，坐長途車時大家齊齊唱。《同舟共濟》是其中一首人人皆曉。不過我年紀太細，未有留心歌詞。
《同舟共濟》主題人人都識，就勸人莫移民。 香港是我家，今日成就得來不易。
我與你同坐這條船，無情浪把它猛捲，滿天風雨，
視野未能見，亂作一大團，不知怎算。
既決意留在這條船，齊齊令它不遭破損，困境挑戰，
奮勇地面對，令到這條船，永不翻轉。
香港是我心，一顆不變心，實在極不願，移民外國做二等公民，之後一段開始未留意過，竟然係預測香港局勢會好轉 (!!!)
必須抱著信心，把基礎打穩，盡力地做我本份，定能突破戰勝黑暗。
破鏡明日定會重圓，時局定必得好轉，懷著希冀，
再創造時勢，令到這條船，永久溫暖。
之後編曲開始升級。如果雨傘革命在金鐘萬人大合唱，一個二個應該已經舉起手機！
香港是我家，怎捨得失去它，實在極不願，移民外國做遞菜斟茶，
緊緊抱著結他，傾出這心裏話，但藉著這番話，
聽到這裏，我熱血沸騰！移民外國何止「二等公民」，還要「遞菜斟茶」喎！的確，小時候就都聽過不少長輩講過移民之後的就業問題，今日術語係「向下流動」。專業人士就算識英文都只能夠做低級文職。老師移民溫哥華之後要做侍應，點知遇到學生家庭光顧，在「遞菜斟茶」的一刻，以前的老師威嚴掃地。
究竟歌神咬牙切齒「藉著這番話」想點呢？呼籲全港市民槍口一致對外？呼籲全球港僑回港建國？在這零點零零零一秒，歌神聲如洪鐘地唱出全首歌最關鍵的一句：
齊齊共你，發洩一下
吓？呀歌神，乜你咁幽默呀？囧。但見到今時今日唱K社運方興未艾，一個二個在大台「緊緊抱着結他」，又確實真係廢得只剩下「發洩一下」。歌神真係歌神，請受小弟一拜！ Orz.