上次四叔講完 south bay 屋價租金同時高企唔關投資客事，即刻有人問：既然唔關投資客事，咁究竟 south bay 樓市係咪泡沫？雖然四叔完全唔明條問題上文到下理有乜邏輯關係，不過可以傾吓「泡沫」呢樣嘢。
上文講到「炒家」定義好虛，其實「泡沫」都係。人係接受唔到商品價格一下子大升。所以凡係見到嘢一時間貴咗好多，就話係「泡沫」。股票急升係泡沫，屋價急升係泡沫，租金急升係泡沫，匯豐150蚊紀念鈔急貴係泡沫。而叫得做「泡沫」，就即係會價格急升完會以同樣速度急跌，地心吸力一樣，拋高個波，個波會跌。價格跌嗰下，叫「泡沫爆破」。
咁乜嘢嘢急貴會係泡沫呢？歷史上，荷蘭鬱金香試過係。呢個世界，冇人冇咗鬱金香會死。錢擺喺銀行有息收，攞喺鬱金香度，就純粹搏升。一旦知道鬱金香唔會升，就一毫子都唔會用嚟買鬱金香。結果，一剎那間，鬱金香唔似會升，就冇人接貨，冇人接貨就更加唔似會升，唔似會升就更加冇人接貨，音樂椅遊戲玩完。
咁 South Bay 屋市係咪泡沫？我唔答你住，如果你睇完呢篇同之後幾篇都唔明嘅話，四叔答你都冇用。嗱嗱嗱，講明先，我以下講嘅嘢淨係關 South Bay 事，可能應用到少少喺 San Francisco 同 Peninsula 度, 不過如果你以為 East Bay，Sacramento，Santa Cruz 甚至 Vegas 都係咁，你會死得好慘，到時唔好話四叔點你。古語有云： 路畸詢，路畸詢，路畸唇。
South bay 最多係乜？有名矽谷就梗係矽啦......至奇。係 tech 公司嘛。你知 Facebook, Google, Linkedin, Apple, Netflix, Yahoo, Dell, 泡菜三叔呀請幾多人先得㗎。關鍵唔係請咗幾多人，而係喺 south bay 請多咗幾多人。你可能會話「唓，我鬼知佢哋想擴張請人喎。如果我估到，我夠知啲人會嚟搶租搶屋買啦！」唉，而家啲後生仔個個都咁嘅態度同我講嘢。不過我可以話俾你聽，四叔係一早估到嘅。四叔幾年前已經估到這個 trend。唔使眼紅，叫得做四叔你估流㗎。
呢啲公司擴張請人之前要做乜？要買office space 嘛！你睇 Facebook 由 Palo Alto 搬去 Menlo Park 加大 campus。Apple 改建總部。Google 越擴越大，由 Mountain View 蔓延出去 Palo Alto 同 Sunnyvale。Linkedin 直頭起埋大大幢喺 Sunnyvale。呢啲公司唔係擴張嘅話，起 office 唔通轉行做發展商攞嚟賣咩？新嘅 office 樓面要 fill in 嘅人喺邊度嚟？冇可能全部都係 south bay 以內請返囉。
South bay 之外嘅人移入 south bay 之後，一係租一係買，總之要住（當然有一兩個傻佬會選擇瞓喺架車入面）。住喺邊？唔係 south bay 就 san fran 㗎啦。San fran 咁貴，而且就算有公司 shuttle 來回都係需時，一定好多人選擇住返喺 south bay。結果多咗人租屋住之餘又多咗人買屋住。
咁 south bay demand 上升，係咪剩係因為多咗人租屋住同多咗人買屋住？咁又唔係， Palo Alto 好多地產公司直頭飛去強國招客，週末仲要有免費巴士團睇 open house。呢啲離地嘢下次四叔先至講啦。