次按危機之後冇幾耐，矽谷樓價和租就開始止跌回升。四叔當年住喺 Mountain View，租一啲都冇跌過。由 2010 年尾開始，就望住樓價開始由 Palo Alto 開始，然後到 Cupertino、再之後都 Sunnyvale 同 Mountain View 好學區嗰部份，然後狗屎垃圾全個 south bay 都升晒。連續Sunnyvale/Mountain View 次一等區域、San Jose、Santa Clara、Milpitas 都一齊雞犬升天。本來樓價升嘅話可以遲啲入市睇定啲，點知唔止樓價，連租都升到 hihi，搞到一個二個港燦都唔知買好唔買好，毒L們買咗驚跌，又驚要可能人老珠黃要返香港娶港女，到時就要急賣，唔買就焗住捱貴租。四叔每次同人講起呢個話題，一係就之前買咗屋上咗車笑都見牙唔見眼，一係就痛罵炒家。
四叔發現香港人郁嘅就話人係炒家。買完三個月後賣嘅係炒，買完當渡假屋 deal 空兩年再賣嘅係炒，買完放租租約完咗兩年賣嘅係炒，買完放租二十年之後賣嘅係炒，買完冇賣嘅係炒。總之買完自己唔 dut 個屎忽入去住嘅，就係炒。但咁樣對理解樓市一啲都冇幫助。
2010年底，香港天才特首 Sir 曾蔭權為咗打擊「炒家」，決定為持貨不足兩年的賣家收特別印花稅。這亦是香港首次為「炒家」下定義：持貨不足兩年就賣。四叔雖然認為 Sir 曾蔭權嘅打擊「炒家」措施係鳩做，因為這定義下的「炒家」根本不可能炒起樓市（因為持貨力有限，買完一定要放，急到要瀨），不過認為呢個「炒家」定義可取。因為呢啲炒家先係真真正正投機。投機並無貶意，在自由市場投機者有佢哋嘅作用。試想下一個人要突然賣樓套現，或者要突然買樓，佢哋可以喺市場上面問邊個買同賣？而家香港樓市缺盤乾升都係多得香港一系列「趕絕炒家措施」。
講返 south bay, 喺加州要咁樣短買短賣炒樓法唔係唔得，不過通常都冇肉食，因為手續費太貴。所以即使短買短賣，通常都要另外翻新 (flipper) 先有利可圖。當然，呢種手法會出現喺樓花，因為當樓花落成收樓當日，喺大升市裏面，樓價已經升咗一 jum。
投資物業最常見嘅方法就係買屋收租。咁買屋收租屋主係咪搞到 south bay 人問地獄嘅元兇呢？我唔直接去答你，用例仔答你。收租佬的確令市場多咗一個買家，又真係推高咗樓價少少。而家 Palo Alto 一個盤，十個 offer 可能有兩三個收租佬，七八個自住友。但如果收租佬買到嘅話，咁市面上就多一個租盤，照理租會受壓。咁點解租一直升到而家？如果自住友買到嘅話，咁市面上應該少一個買家，屋價會有壓力。咁點解屋價一直升到而家？
喺市場上，收租佬嘅角色只係將賣盤變租盤，而收租只否有利可圖取決於好多嘢，當中利率好緊要。要現解 south bay 屋價租金之謎，要去返 first principle, supply and demand。點解買屋嘅人買極都仲有，點解租屋嘅人租極都仲有，同埋點解少賣盤同租盤。以上每點日後會詳談。Meanwhile，唔明唔緊要，四叔唔會點你嘅，唔好再怪收租佬先。
