【南灣四叔】強國人搶貴晒啲屋？

成日有人問四叔：「強個人係咪搶貴晒啲屋？」四叔唔直接答你，我用例子答你。

唔好「唓」住，四叔食鹽多過你食米，睇 open house 多過你睇四仔。四叔睇屋嗰陣，周不時會聽到樓上有個疑似思覺失調嘅人，明明得自己一個人都要大大聲用捲脷普通話自言自語，有時講下「您看看這個好不好？」、「這裡是房間」、「沒有啦，這個拉不動的」、「對對對對對」，有時大笑，有時似鬧交，對於思覺失調嘅人，我哋係應該接納同包容嘅。不過呢啲唔係思覺失調，佢哋係 agent，用電話俾大陸個客直接睇間屋點點點。你知啦，大陸上網服務全球最高最快最強，除咗 Facebook, Google, Twitter 之外度度都上到。

睇完 open house 或者 model home，睇啱想買都唔係咁易，因為好多人爭（四叔知你諗緊乜，「tell me something I don't know」呀嘛)。新盤好多時都要抽籤，因為供不應求。抽嗰陣要所有人一齊，有幾多係打工仔，幾多係強國金笸籮（全家總動員嚟買），幾多係幫強國客入貨嘅 agent，一目了然。正常人買樓係重大決定，買之前思前想後。間屋幾大幾細，幾多間房幾多個厠所，東南西北都搞清楚先落 bid。而有錢無掟使嘅強國人就唔同啦，抽完都唔知自己買咗乜，連間屋喺個 community 邊個位都未搞清，堅有霸氣。

而家啲新盤，有啲仲有簡體字傳單廣告，仲有埋中文電視廣告，甚至中文名㖭！二手咩？睇完分分鐘幾個 all cash offer 同你爭，兩個禮拜就可以交吉（用家用 mortgage 買一般要成個月）。總之強國人無處不在。

咁強個人係咪真係搶貴晒啲屋？咁要睇下你嘅「強國人」指乜嘢。「強國人」有富有貧；有公司，有個人；有買嚟擺，有買嚟自住，有買嚟俾個仔讀緊書住住先，有買嚟放租，有買嚟起樓。唔同類型對屋價有唔同影響：

• 強國公司. 近年的確有好多強國公司喺三藩市灣區買地起樓，住宅寫字樓商戶都有。呢類投資要回本（住宅嘅要賣、寫字樓商戶要放租）除非公司不計成本不計回報喪買地，否則對供求影響不大。發展商嘅嘢，一係強國公司，一係非強國公司。
• 強國人買嚟擺. 你知啦，大陸政治人鬼難測，錢留喺大陸都係唔安全。再者，大陸樓最興有價冇市，都係海外安全啲。去唔到美加澳紐都會去香港。買嚟擺確實會托起樓市，因為買完之後，間屋就進入咗黑洞。房屋供應從此又少了一問。
• 強國人買嚟自住. 話明自住即係喺灣區生活，咁又真係唔係好關強國事。須知強國都有打工仔。
• 強國人買嚟放租. 如果超多強國人不計成本不計回報喪買搶貴晒放租，租應該可以壓到好平。只可惜呢樣嘢無發生到，因為灣區租仲好貴。呢點之前講過。

咁點啫？係咪搶貴晒啫？咁你可以想像下，如果今日，市面上一個 penny 嘅強國資金都冇，屋價係咪會跌都 hihi？如果真係咁，要解決住屋問題就真係好易，只要好似澳洲咁，唔俾強國資金買咪得，使乜又要起 affordable housing ，又要為首次置業人士提供資款，又要租務管制咁做萬七樣措施。上個禮拜都講過，灣區的確係多咗人，就算冇強國錢都一樣供不應求。

話強國錢「搶貴晒」係誇張咗啲，不過多咗錢流入市場，多咗人買完間屋之後唔住唔賣唔放租，又確實係會「搶貴咗」。強國人無處不在，避無可避，之但係有幾類屋係強國人嘅「飛佛」，落 bid 買可謂同強國資金短兵相接。四叔祝你好運。

• 新屋. 強國人特別鐘情新盤。無他，俾人住過晒，點住呀？就算唔係發展商新盤，都鐘意將舊屋推土重來起新屋。所以買 brand new 屋就要預咗有個「強國至愛」 premium，日後賣二手嗰陣未必回到本。
• 華人特多嘅市鎮. 強國人離岸買屋，多數 through 同聲同氣嘅 agent，而同聲同氣嘅 agent 通常手頭上多華人市鎮嘅盤。「帕罗奥图」、「圣何塞」、「库比蒂诺」算係重災區。不過如果你想買好校區嘅就真係無計。
• 超豪宅. Well，如果你買得起 10 bedroom，成 acre lot 嘅大宅，你都唔使憂冇地方住。有乜嘢好路數記住預埋四叔啦吓。

總而言之，強國水喉的確係堅嘅，亦都真係托起咗樓市少少。大概由 2011 年尾開始，市面上先至有咁很多強國人出没買來買去。四叔就唔信同「買樓 visa」無關囉。咁既然 south bay 屋價呢幾年就算升咗咁多都仲有價有市，點解發展商唔勁推新盤，反正新盤一定賣得出？用香港術語，點解南灣咁少「一手樓」？呢層四叔下次先答，等埋發叔先。