 |
| 這個級數的舞獅，要在三藩市唐人街才見得到。（Wikipedia Commons） |
農曆新年，美國當然無假放，無假放自然無節日氣氛。往年年卅晚放工翌日返工，收爐收條毛。難得今年歲晚落在星期日，平凡的週末竟然令星期五放工有收爐的感覺。
三藩市尚且有唐人街，南下中半島的 downtown 還會係咁易掛下直幡橫額 Kung Hay Fat Choi。再南下去到南灣，街道上就幾乎看不到農曆新年的痕跡。事關今年 Super Bowl 會南灣 Santa Clara 舉行，適逢賽事五十週年，預計吸引一百萬人前來灣區，街頭上大多是有關 Super Bowl 的封路改道告示。
美國人的 football 和全世界都不同。來了美國十幾年，至今仍不懂得欣賞美式足球 football。即使大致懂得規則，始終覺得比賽大多停頓，再幾十秒一分鐘又 time out。識欣賞的，只有中場表演和中場廣告。Super Bowl 是美國一年一度的大事，入場票早已炒至天價，開幕唱國歌要請 Lady Gaga 才夠份量。不少重本製作的電視廣告也將會在中場廣告位首映。當年 Apple 介紹 Macintosh 面世的 1984 經典廣告，就是在 Super Bowl 廣告時段亮相。
Super Bowl 撞正歲晚年廿九舉行，也許會是不少竹昇家庭的團年節目，畢竟農曆年是少數竹昇會過的傳統節日。不過講波佬既不講廣東話又不送足金金猴，fresh off the boat 的我要是做家庭觀眾睇人撞人，恐怕只會更加思鄉。一年十二個月在美國都生活很自在，偏偏就是過年這幾日會感受到人離鄉賤，特別是香港有假放美國無。
不在香港也逃不過要拜年，隔着電話背盡一切人類認知範圍以內的四字賀詞。科技進步，講電話只要出聲，未梳頭無換衫都無問題，現在要出樣就麻煩得多。以前在香港時討厭拜年，事事批判，覺得一年只見一次，行禮如儀無意思。倒是現在長輩同輩，親戚朋友都老了，自己又離鄉別井，開始珍視傳統節日，擔心若果連拜年都不講一兩句的客套話，日後想見也未必會有機會了。