 |
| 2008 年民主黨 Iowa 黨團會議其中一個地區分部。（Wikipedia Commons） |
習慣放工返屋企就打開電視，重播預錄的 KTSF 粵語新聞。雖然美國世界香港大事都已經在返工時間知道，但仍然喜歡電視播着廣東話。偶然知道多一兩件 local 大小事固然有用，純粹作為背景音響亦無妨。
共和黨和民主黨在星期一分別舉行了第一場黨團會議。美國政黨決定總統參選人，和總統選舉相似。各黨分別在每個州分配若干 delegate 選舉人票，人多的加州多點，人少的 Montana 就少得多。有意獲提名的候選人，會在每州的黨團會議或者初選角逐，以求獲得選舉人配額。選舉人無獨立意志，而每個州民主共和兩黨對選舉人票的分配又各有不同。例如在剛過去的 Iowa 民主和共和黨團會議，分別都按支持比例分配選舉人票。民主黨的希拉莉和 Bernie Sanders 平分秋色，共和黨的 Donald Trump、Ted Cruz 和 Marco Rubio 大致上三分天下，小布殊細佬 Jeb Bush 幾乎影都無，也分到一張選舉人票咁大把。
雖然一般統稱「初選」，黨團會議 caucus 和初選選舉 primary 不同，黨團會議由政黨自己舉辦，純粹自己友聚會，聚會中決定每個黨內參選人所得的 delegate 數目，實際上是黨內選舉。初選選舉就大陣仗得多，由州政府舉辦，登記選民到票站投票。州政府為政黨舉辦初選，聽落很離奇。香港人好難想像政府為民建聯搞初選，確定 Tree Gun 獲提名一樣。雖然美國聯邦無政黨法，但每個州對政黨的定義處理都有所不同。同樣地，美國選民登記州州有異，有些州容許選民申報政治聯繫。因此有些州的政府能為政黨舉辦初選，當中不一定只限民主共和兩黨。初選選民的資格又是州州不同，有些初選只限申報共和黨的選民去共和黨初選，有些容許無申報的選民（所謂獨立 independent 或無申報 undeclared）去投，有些甚至容許所有選民去投，視乎州的政黨法而定。
各州各黨的初選時間亦大不同。Iowa 同 New Hampshire 通常打頭炮，排最後的州份無人記得，因為到時政黨人選已經塵埃落定。早舉辦初選的州份，就算人少也會受到候選人和傳媒注目。反而選舉人票勁多的加州，初選排到六月，到時連參選人都好大機會退得七七八八。廿一世紀，要各州同日決定黨內提名人，照理應該易如反掌。屆屆有人講，人人都讚成，但結果又係屆屆由二月選到六月。美國政界的古老傳統，比亞視更永恆。
共和黨和民主黨的 Iowa 黨團會議結果，早就在網上得知。所以返到屋企，聽到 KTSF 報道希拉莉贏 Sanders 四票已經懷疑資料有錯，之後再聽到：「⋯⋯民主黨的黨團會議就冷清得多，全州只有不夠一千五百人投票。 」當堂個心離一離。共和黨十幾萬黨員投票，民主黨只有千幾人，冷清都咁？
Iowa 州這樣大，民主黨黨團會議分別在各個縣（county）舉行。和州一樣，每個縣都有選舉人票配額，再由縣選舉人票按比例推算出 state delegate equivalent。而民主黨黨團會議不會公布實際票數，而只會分佈候選人所得的 state delegate equivalent，再由 state delegate equivalent推算州選舉人票。民主黨黨團會議不公佈投票人數，只公佈這一千四百幾個 state delegate equivalent 花落誰家。 事實上，當日有超個 17 萬人出席民主黨黨團會議。
Iowa 只是第一站，共和民主兩黨的熱門都勢均力敵，論勝負言之尚早。希拉莉有黨內大老撐，未選已經在選舉人票大幅領先 Sanders，而且在 Iowa 抽籤六戰六勝，行運行到腳趾尾。一向討厭她的談吐舉止，聽到就煩見到就厭，僅比 689 順眼少少。不過也得接受現實，美國很可能會出現女總統候選人，甚至女總統。
