學咗日文幾個月，開始聽日文歌。不過人到中年，接到唔到時下後生仔嘅歌風。聽親都係九十年代啲日文歌，旨在同當時廣東歌差唔多。Well, 正確說法係當時好多廣東歌改編自日本歌。九十年代 J-pop hit 歌 list 喺 youtube 比比皆是。每次聽到一首廣東歌的日文原版，都會即刻拿拿淋跟住唱廣東話版歌詞。
直到有一首，好熟但一時噏唔出歌名
過咗幾句先恍然大悟，《唯獨你是不可取替》？乜原曲係咁樣跳跳紥的麼？呀，我接受不了.jpg 仲要咁重 band sound？鬼咩，原來中山美穗同 Wands 的共同作品。想像下如果《唯獨你是不可取替》由鄭秀文同 Beyond 合作，大概都係咁款。
問一下 Google 神，隨即發現原來最少有四個華語版。當中最早之一是黎明詩的《敢恨敢愛》。當年流行的大批 dancer 跳舞 MV 同埋懶型嘅燈光。播完成個 MV 我都睇唔清黎明詩乜樣。編曲同原曲大致一樣，最初幾下鼓，比原版更加配合氣氛，襯返一大班人跳舞。歌詞一般，當時大路題材。林夕黃偉文興起前，歌詞大多都係咁，描寫熱戀失戀來來去去都係嗰堆字。
講起《唯獨你是不可取替》，很多人都會想起鄭秀文同許志安合唱版。原來鄭秀文自己出過一首改編。歌詞好好多，好似千禧年前後開始嘅歌咁講故事，以具體事物代替抽象感受，故事有晒起承轉合。一查，唓，林夕填詞。今時今日，有幾多人會聽電台，仲用收音機聽，仲要打上電台點唱之食表白對象又聽緊？呢首歌都算係口述歷史。
國語版高明駿同王馨平嘅 《今生註定》完全未聽過，連高明駿乜水都唔知。不過編曲改得好好，好有氣氛，毫無K味。深情歌係唔需要 G.E.M 式鳩叫的。這種電子琴扮管弦樂器聲，好假，但 I like it。懷舊嘅人就係咁。
香港最出名嘅版本，當然係許志安原唱嘅《唯獨你是不可取替》。編曲同《今生註定》一模一樣，肯定係一個跟另一個。但編曲 credit 各有不同，咁係邊個抄邊個，都真係唔知。時問上好似《唯》比《今》早。
最 sweet 可能係呢個
曾幾何時改編歌係香港國際城市表現。日本歐美歌，只要夠 hit 啱香港人胃口就可以堂堂正正改編。直到九十年代中，商台乜叉鼓勵原創之後，改編變成抄歌。香港人口味變後內向，之後嘅歌就喺 K 歌裏面溏水滾溏魚近親繁殖。趕絕改編歌，趕絕嘅，仲有香港嘅品味。
