South bay 樓市仍然活躍。一個正常 list price 嘅盤放出市面，無論係 apartment、townhome、定係 single family，一放閒閒地有十個八個 offer。租市亦都係咁，一放 craigslist ，只要叫租合理就唔憂租。總之搵地方住嘅人多得很，再有強國水喉火上加油，租同屋價都真係好難唔升。
凡係有細路嘅，都唔會想學期中間搬屋，所以暑假係樓市旺季，盤比其他月份多。不過盤多搵屋嘅人亦多，一般旺季屋價亦比淡季高。美國屋價指標一定係同上年同月比，唔會好似香港十原指數咁逐個月計。
點解 south bay 咁少盤？又係土地問題？True，south bay 每一寸地都有用途，zone 咗做住宅嘅都已經全部係住宅。呢頭又唔可以好似 peninsula 咁填返個 Redwood Shores 同 Foster City 出嚟，因為要保育同埋有海嘯威脅（有冇留意過 237 以北冇往宅，只有 office 同零售？）如果每寸地都用盡就無新盤，咁 south bay 應該一個新盤都冇，咁而家新盤點嚟？問題唔係土地用晒未，south bay 啲地用晒咗幾廿年，而係點解咁難有新盤，就算有都得咁少單位，少到供不應求。而要知點解咁難有新盤，就要睇下而家啲新盤係點嚟。
最常見係改變土地用途。以前 south bay 好多農場，之後好多工廠。Intel、AMD 最早嘅廠都係喺自己 office 隔離，之後各種原因，地貴呀、環保標準提高呀、美國人工貴外國人工平呀咁先至搬走。原本塊地可以變做甲級寫字樓，可以變做零售，可以變做住宅，或者幾樣撈埋（mixed use)。之後又可以變做住宅。同一塊地，用嚟做住宅最值錢，好少由住宅變做非住宅。近廿年最大規模嘅例子莫過於 Rivermark，由原本精神病院改為住宅零售，塊地大到一個發展商都食唔晒，要幾個發展商一齊 master plan。不過呢啲例子好少有，好多年都無一單。
除咗咁之外，舊屋拆完可以起新屋。華人最鐘意將 Cupertino 同 Palo Alto 啲舊屋推土重來，千幾呎一層三房拆完起返間三千呎兩層五房。地積容許幾大就起到咁大，一呎都不能少，每一呎都係錢喎。另一種常見嘅方法就係拆完一間，或者前後左右幾間，然後再起返幾間 single family 或者幾間 townhome，反正塊地夠大就得。
無論改變土地用途定係發展項目本身，都要 city council 批准。South bay suburb town 仔一般有幾萬人同五至七個council 議員，以真·普選產生。每場選舉都係業主和租客之爭。租客一般支持多起屋，因為供應多可以頂住租金升幅。業主就一般反對增加人口密度。有時選出嘅 council 會係 pro-housing 以舒緩租金壓力 (例如今屆 mountain view），有時 council 會 anti-development 以減輕人口壓力。總體上，改變土地用途去起多啲住宅一直都有，不過唔係個個項目都批，而且對於不斷增加嘅需求，可謂杯水車薪。
明明 south bay 越來越多人，業主唔想增加人口密度咪好自私？有冇搞錯！咁你又要諗下喎，你試下日抖喺 Palo Alto downtown 食完 Cheesecake Factory 之後想上 101 出 san fran，你會發現條命短啲都上唔到 101。Palo Alto 人多車多路窄，根本百九幾年前無人諗過會有咁很多人，仲要一戶兩架車。Mountain View、Sunnyvale、Cupertino、Los Altos 全部都係咁。其實莫講話一百年前，三十年前都冇人諗過會有咁多人湧嚟住，連 Mark Zuckerberg 都未出世， Larry Page 仲係細路仔，點會諗到啲 tech 公司會請人請到咁？除咗交通，仲有學校。喺 south bay，地址決定學校，而學校又有受歡迎程度之分，所謂「好校區」嘅屋會貴啲。如果「好校區」太多適齡學童，個「好校區」就可能要重新劃界，某啲屋會被劃走，嗰啲業主一般會選擇同你死過。
加州業主要畀物業稅（華人俗稱之為地稅，technically 唔準），south bay 呢頭係物業估價 1% 多少少。本來屋價升嘅話，物業稅都會升，咁業主為咗交少啲物業稅，會有 incentive 去控制屋價唔會暴升。不過 1978 年嘅 prop 13 （公投項目）改變咗呢個生態。Prop 13 規定除非轉手或改建，否則物業稅不能升超過 2%。由嗰陣開始，就算屋價升到癲，業主嘅物業稅都唔會暴升，最多同通漲差唔多。咁嘅遊戲規則，業主仲有冇理由去增加人口密度呢？屋價升，自己紙上富貴又唔使捱重稅。
四叔唔係話自住業主有責任去犧牲自己生活質素去提高人口密度，令更加多外來人可以 pack 沙甸魚咁 pack 入 south bay，搞到 south bay 鎮仔好似 san fran 咁。四叔只係想講，like it or not，south bay 少盤，係結構導致。經濟差股市差嗰陣會少回，經濟好股市好嗰陣大漲。唔同 neighborhood 會有唔同幅度，有快有慢。Palo Alto、Mountain View、Sunnyvale、Cupertino、Los Altos 嘅 demographics 同埋屋種亦都各有不同。不過整體嚟講，要望 south bay 嘅屋價大跌，一係電腦科技唔再係全球經濟火車頭，一係就係矽谷嘅科技中心地位被取代，科技龍頭將總部移離灣區。黑天鵝有幾大機會出現，如果四叔有水晶球嘅話，就一早發到好似香港嗰個四叔咁啦。
